|
SAUNOAGA AUTU
AFIOGA I LE MINISITA O FA'ATOAGA & FAIGAFAIVA
Hon. To'omata Alapati To'omata
MO LE TAPUNIA O FA'AALIGA
O FA'ATOAGA
MO UPOLU - 2005
1. Ua sao amo ua tuana'i
fo'i Apolima e pei o muagagana masani a le Atunu'u. O lea
ua tu mai i lagi le laga'ali a Tamafaiga aua ua fa'afofoga
alofa le Atua i le tatou talosaga i le itula ua sola, ae
tainane fo'i le saunoaga fa'ala'ei'au o le Afioga i le Ta'ita'i
o le Malo, i le tatalaina o le tatou aso ma lo tatou fa'amoemoe.
2. Ua tulagavae tasi
la e pei o le Aiga o Sa Tagaloalagi, ua taia fo'i i le tafao,
taia i le va'ai sa'afiafiga o lenei aso e fa'apitoa i le
Aufai-fa'atoaga ma le Aufai-faiva, o le mamalu lava lea
o Samoa i ona tulaga fa'alupeina.
3. O le agaga fa'afetai
e fia fa'aleo e le Matagaluega ma le Malo aemaise le mamalu
ua taupati mai e ala i le tu'ufa'atasia o lenei fa'aaliga
mo lenei tausaga. Le mamalu o le Aufai-fa'atoaga, le Aufai-lafumanu,
ma le Aufai-faiva fa'apea le Augaosi-oloa o le tatou Atunu'u
o Upolu nei, ua fa'amalo le fai o le faiva, fa'afetai le
lagolagosua i le tatou Matagaluega aua ana le seanoa la
outou lagolago mai e le mafai ona ATOA le fa'ataunu'uina
o lenei fa'amoemoe.
4. E vaivai le tagata
ae a tu'utasi faiva o Pili i le ta'ita'iga lilo a le Tapa'au
i le lagi, ona tatou malolosi lea ma a'e malo o tatou faiva
aua le tapuaiga a le atunu'u.
-2-
5. E fa'apitoa le fa'afetai
i lau Afioga i le Ali'i Palemia, ona o le le muta pe fa'aitiitia
lau tu'ualalo ma le fa'amalosi'au e ala i polokalame o le
Atina'e o Samoa e pei ona afua matagi ai lenei Matagaluega.
6. E le ufiufia fo'i
fa'amanugase le taua o galuega a le Aufai-tatalo ina ia
manuia le lau'ele'ele ma le sami o Samoa, e ala i meaalofa
taua a le Atua ua tatou maua mai ai, e pei ona tatou molimauina
i lenei aso.
7. O le a le fa'amatafauloaina
se fa'amatalaga, aua, e pei o le manino o le mata o le vai,
ua fa'apena fo'i le pupula matagofie o lenei fa'amoemoe.
8. Ae tau ia ina alofagia
e le Atua a tatou taumafaiga i le atina'eina o fa'atoaga
ma faigafaiva i totonu o si o tatou Atunu'u. E leai lava
se faiva e 'asa ma se maumau. Aua e so'o se galuega tatou
te faia e i ai ma fa'afitauli, ma o fa'afitauli lava lena
e lu'itauina ai lo tatou ola taumafai ma lo tatou soifua
finafinau.
O ni taui ma ni fa'amanuiaga
ua outou maua e ala i ni fa'ailoga i lenei aso, e talitonu
le manatu, e le o le fa'ailoga po'o le taui, ae o le amana'ia
o la outou tautua ma le sao i le atina'eina o le tamaoaiga
o Samoa, o le mea sili lea ona taua i le Malo.
-3-
Ia saga tului atu pea
fa'amanuiaga mai le tatou Tapa'au i le lagi i lo outou mamalu
i le feagai ai ma tausiga o aiga, osiga o nu'u, le tautuaina
o si o tatou Atunu'u tau atia'e, aemaise o lana Talalelei.
9. O le vaiaso fou
i le Aso Lulu 25 o Oketopa, ua atofaina mo le Fa'aaliga
o Fa'atoaga mo Savai'i, ma o e uma e fia auai, tatou feiloa'i
ai pe a pule alofa le Atua e maua pea lo outou soifua laulelei
ma so matou ola.
10. Ae o le taimi lenei
ou te fa'apea atu ai ma le agaga fa'aaloalo, ua tapunia
aloa'ia nei le Fa'aaliga o Fa'atoaga mo le Motu o Upolu.
Soifua ma ia manuia.
—————————————————————————————————————————
SPEECH BY MINISTER OF AGRICULTURE
& FISHERIES
Hon. To'omata Alapati To'omata
FOR
THE CLOSING CEREMONY OF THE AGRICULTURAL SHOW IN UPOLU OCTOBER
2005
We have now come to the end of our Agricultural Display
for farmers of the Island of Upolu.
I wish on behalf of
the Ministry of Agriculture & Fisheries and Government
to thank all the farmers of Upolu in the crops, livestock,
fishery sectors of our Industry for making this day; a day
to display the fruits of their labours, a successful one!
Indeed without your contribution and very strong support,
the Ministry of Agriculture & Fisheries could not have
brought about the splendid displays we have witnessed here
today.
Our special thanks
also to the members of our business community, the non-government
organisations, and the processors and manufacturers for
their tremendous assistance which has contributed greatly
to today's success.
Our appreciation is
also extended to FAO, UNDP, JICA, the Peace Corps and other
donor agencies for your continual assistance and support
of our Agricultural Industry.
Thank you, Fa'afetai
tele lava.
I now declare the Agricultral
Show of Upolu - 2005 -
close.
Soifua.
|